09 Mai 2007
Mae S4C wedi ennill ei gwobr fawr gyntaf am ei brand newydd yng Ngwobrau'r Undeb Darlledu Ewrop (EBU) yn Lucerne, Y Swistir yr wythnos hon.
Lansiwyd y brand newydd, a gaiff ei integreiddio yng ngwasanaethau S4C ar yr awyr, oddi ar yr awyr ac ar-lein, fis Ionawr eleni er mwyn disodli'r hen frand a oedd wedi bod ar waith ers 1993.
Wedi ei gydlynu gan Dylan Griffith, Cyfarwyddwr Creadigol S4C, a’i greu ar gyfer S4C gan Proud Creative, nod y brand yw rhoi diwyg ac agwedd gyfoes i S4C a fydd yn paratoi'r Sianel at yr oes ddigidol-yn-unig yn 2009.
Enillodd y brandio newydd y wobr am y ‘Pecyn Cyfan’ yng Nghategori’r ‘Dylunio Gorau’, sef y brif wobr a roddir gan yr EBU Connect, y gymdeithas bwysicaf ar gyfer darlledwyr y byd.
Meddai Max Johns, Cydlynydd EBU Connect: “Fe wnaeth arddull unigryw’r pecyn cyfan a gyflwynwyd gan S4C greu argraff fawr ar y beirniaid. Roedd y beirniaid o’r farn bod yr holl elfennau amrywiol yn creu pecyn crwn, cyflawn. Mae gofyn am ddewrder i greu pecyn gweledol o’r newydd ac mae’n dangos hyder yn y rhaglenni. Mae’n rhoi balchder i bobl weithio i sianel sy’n unigryw.”
Meddai Iona Jones, Prif Weithredwr S4C: “Nod y brand newydd yw adlewyrchu agenda S4C ar gyfer rhagoriaeth greadigol ac i helpu i roi amlygrwydd i’r Sianel fel darlledwr aml-lwyfan yn yr amgylchfyd digidol. Rydym yn falch iawn fod y brand ei hunan bellach yn cael ei gydnabod am ei ragoriaeth greadigol gan un o brif sefydliadau’r diwydiant darlledu.”
Ychwanega Dylan Griffith, Cyfarwyddwr Creadigol S4C, “Roeddem am i hunaniaeth newydd y Sianel adlewyrchu apêl eang a chyfoes holl wasanaethau S4C. Mae’r wobr ‘Pecyn Cyflawn’ yma yng Ngwobrau Dylunio’r EBU yn cydnabod ein bod yn cyflwyno delwedd gyffrous, ddeinamig a datblygedig y Sianel i gynulleidfa ryngwladol ymhob cyfrwng.”
Mae’r gyfres gychwynnol o ffilmiau hyrwyddo, a saethwyd mewn lleoliadau amrywiol ar hyd a lled Cymru, yn seiliedig ar y syniad o berthyn ac o atyniad i Gymru, ble bynnag y bo rhywun.
Rhoddodd y cyfarwyddwr arobryn Simon Ratigan ei stamp gweledol arbennig ei hun ar y gwaith creadigol. Ymhlith y cyfranwyr eraill i’r prosiect roedd: Minivegas, Freefarm, The Acid Casuals, Marc Ortmans, Rushes, John Hill, Ariane Geil, Lineto a Core Multimedia.
Diwedd
Nodiadau i Olygyddion:
Ers 1991, cynhelir cynhadledd yr EBU Connect yn flynyddol mewn lleoliad gwahanol yn Ewrop. Trefnir y gynhadledd ar gyfer pobl broffesiynol yn y diwydiant teledu sy’n ymwneud â hyrwyddo ar sgrin, marchnata a chyflwyno, dylunio a brandio. Caiff ei gydnabod yn fwyfwy fel prif fforwm ar gyfer y rhai sy’n ymwneud â gwasanaethau creadigol ym myd teledu yn Ewrop. Nod y gynhadledd yw annog cyfathrebu cyson a chyfnewid gwybodaeth.
Roedd rhan o’r gynhadledd yn 2007 yn cynnwys sesiynau ar ail-frandio, gydag esiamplau o S4C, BBC1, y sianel Almaenig, MDR a phrif sianel gyhoeddus De’r Affrig, SABC 1.
