26 Mai 2021

Mae partneriaeth newydd wedi ei gyhoeddi heddiw rhwng S4C, Theatr Genedlaethol Cymru ac Eisteddfod yr Urdd i gydweithio ar gystadleuaeth Y Fedal Ddrama yn Eisteddfod T.

Bydd S4C yn comisiynu a chreu ffilmiau o'r dramâu buddugol ar gyfer platfform Hansh.

Yn ddiweddar, mae S4C wedi cydweithio gyda Theatr Genedlaethol Cymru a'r Urdd ar gynllun Dramodwyr Ifanc. Mae mwy na 40 o ddarpar-ddramodwyr yn rhan o'r cynllun hwn ac maen nhw wedi mwynhau sgyrsiau a sesiynau hyfforddiant gyda dramodwyr a sgwennwyr profiadol, gan gynnwys sgwrs gyda Daf James, Bethan Marlow a Roger Williams wedi'i chadeirio gan Mali Ann Rees, i'w paratoi at gystadlu am Fedal Ddrama'r Urdd.

Bydd y Theatr Genedlaethol yn cyd-weithio ar y tri sgript buddugol er mwyn eu haddasu i ffilmiau byrion i'w dangos ar blatfform Hansh, gyda'r ffilmiau yn cael eu cynhyrchu gan gwmni TinInt.

Mae gwobr Y Fedal Ddrama yn un o brif seremonïau Eisteddfod Genedlaethol yr Urdd ers blynyddoedd lawer, a gyda'r Eisteddfod yn cael ei chynnal yn ddigidol eleni eto o dan enw Eisteddfod T bydd Y Fedal Ddrama yn parhau i fod yn un o brif gystadlaethau'r wythnos ac yn cael ei chynnal yn fyw am 4.00 ar brynhawn Mercher 2 Mehefin.

Bydd y dramodydd sy'n dod i'r brig yn y gystadleuaeth Medal Ddrama hefyd yn treulio blwyddyn fel Dramodydd Preswyl Ifanc gyda Theatr Genedlaethol Cymru. Dyma'r tro cyntaf i'r cwmni gynnig cyfle o'r fath i ddramodydd ifanc. Yn ogystal â mentora gan dîm Theatr Gen, bydd cyfle i'r Dramodydd Preswyl Ifanc gael ei fentora gan Gomisiynydd Drama S4C a gweithio gyda rhai o'u hawduron sgriptiau diweddaraf.

Meddai Guto Rhun, Comisiynydd Cynorthwyol Ar-lein S4C:

"Da ni'n falch iawn o allu comisiynu ffilmiau y Fedal Ddrama eleni a'u rhannu gyda chynulleidfa Hansh. Mae gallu gweithio mewn partneriaeth gyda Theatr Genedlaethol Cymru a'r Urdd yn werthfawr tu hwnt ac mae gallu datblygu talentau pobl ifanc a rhoi platfform i arddangos eu gwaith yn rhan o strategaeth ar-lein S4C. Mae themau a negeseuon y ffilmiau'n bwysig iawn a dwi'n siŵr bydd nifer o wylwyr hansh yn uniaethu â nhw."

Meddai Rhian A. Davies, Cynhyrchydd Gweithredol Theatr Genedlaethol Cymru:

"Roedd gweld mwy na 40 yn dod i'r sesiynau hyfforddi yn wych ac yn profi'r angen am gydweithio, i gefnogi datblygu dramodwyr ifanc Cymraeg, rhwng sefydliadau celfyddydol cenedlaethol yr Urdd, S4C a Theatr Gen. Bydd gweld ffrwyth llafur y tri ddaeth i'r brig ar Hansh yn benllanw cyffrous a theilwng i gystadleuaeth Medal Ddrama Eisteddfod T 2021. Mae Theatr Gen yn edrych ymlaen yn eiddgar at groesawu'r enillydd i'n mysg, fel Dramodydd Preswyl Ifanc, ac i barhau i ddatblygu'r Cynllun Dramodwyr Ifanc a'r bartneriaeth gyda S4C a'r Urdd, yn 2022."

Dywedodd Siân Eirian, Cyfarwyddwr Eisteddfod yr Urdd:

"Rydyn ni'n falch iawn o'r bartneriaeth yma gyda'r Theatr Genedlaethol a S4C. Mae'n gynllun fydd yn rhoi llwyfan i dalent ifanc ar blatfform Hansh S4C, ond fydd hefyd yn rhoi cyfle gwych i'r dramodydd buddugol fanteisio ar gefnogaeth a hyfforddiant gan y Theatr a S4C. Rydw'i yn hyderus y bydd partneriaeth fel hyn yn rhoi hwb ac ysbrydoliaeth i gannoedd o bobl ifanc sy'n tyfu drwy rengoedd yr Urdd."