Y Wasg

Bluey yn cyrraedd Maes Awyr Caerdydd i ddathlu lansiad Blŵi ar S4C

21 Tachwedd 2025

Cyrhaeddodd y ffenomenon teledu i blant, Bluey, Faes Awyr Caerdydd heddiw (dydd Gwener 21 Tachwedd) i lansio fersiwn Gymraeg o’r gyfres fyd-eang lwyddiannus, Bluey, creadigaeth Joe Brumm a gafodd ei chynhyrchu gan Ludo Studio.

Mae‘r gyfres newydd Blŵi, wedi ei dybio yn y Gymraeg am y tro cyntaf gan gwmni cynhyrchu Tinopolis ac i'w gweld ar S4C o Ddydd Mawrth 30 Rhagfyr fel rhan o raglenni Cyw ar gyfer plant. Bydd y gyfres yn cael ei darlledu pob dydd Mawrth a dydd Iau, felly gall gwylwyr fwynhau Blŵi yn ystod a thu hwnt i'r Nadolig.

Mae'r gyfres yn dilyn y ci Blue Heeler annwyl, sy'n byw gyda'i Mam (Chilli), Dad (Bandit) a'i chwaer fach Bingo. Mae Blŵi yn defnyddio ei hegni ddiderfyn i chwarae gemau sy'n datblygu mewn ffyrdd annisgwyl a doniol, gan ddod â'i theulu a'r gymuned gyfan i'w byd o hwyl.

Cafodd Blŵi ei chroesawu i Faes Awyr Caerdydd gan ddisgyblion Blwyddyn 2 Ysgol Gymraeg Sant Baruc, sydd gerllaw yn y Barri, yn ogystal â chyflwynwyr Cyw, Griff a Dafydd.

Dywedodd Sioned Geraint, Comisiynydd Addysg a Phlant S4C: “Dwi wrth fy modd bod Blŵi wedi cyrraedd Cymru i groeso cynnes Cymreig. Mae ei dyfodiad hi wedi bod yn rhywbeth mae ein gwylwyr ifanc wedi’i ddisgwyl ers amser maith ac mae’r cyffro ei bod hi yma o’r diwedd yn rhywbeth y byddaf fel comisiynydd yn ei drysori.”

Ychwanegodd Cecilia Persson, Rheolwr Gyfarwyddwr, Plant a Theuluoedd yn BBC Studios: “Rydym wrth ein bodd bod Bluey/Blŵi wedi ymuno â theulu S4C. Mae straeon chwareus a chalonnog y sioe yn cysylltu â theuluoedd ym mhobman, ac mae'n wych bod gwylwyr yng Nghymru bellach yn gallu mwynhau Bluey yn eu hiaith eu hunain.”

Dywedodd Jon Bridge, Prif Weithredwr Maes Awyr Caerdydd: “Rydym wrth ein bodd yn croesawu Blŵi i Faes Awyr Caerdydd ac i Gymru. Mae’n hyfryd gallu helpu i ddod â’r cymeriad annwyl yma i wylwyr ifanc a theuluoedd ledled y wlad.”

Yn dilyn ei ymddangosiad cyntaf yn Awstralia yn 2018, mae Bluey wedi ennill miliynau o gefnogwyr ledled y byd ac mae bellach yn un o'r cyfresi teledu animeiddiedig sy'n cael ei gwylio fwyaf yn fyd-eang. Mae'r ffenomenon, sydd wedi ennill Gwobr Emmy a BAFTA, yn cael ei darlledu mewn dros 140 o wledydd ac yn 2024, y gyfres Saesneg Bluey oedd y gyfres a wyliwyd fwyaf ledled y byd ar Disney+ (yn seiliedig ar nifer yr ymweliadau), y sioe a ffrydiwyd fwyaf (Nielsen), a hefyd y sioe a ffrydiwyd fwyaf yn hanner cyntaf 2025 yn yr Unol Daleithiau 1 . Mae hefyd yn dal y safle Rhif 1 fel y sioe blant orau ar CBeebies 2 a Disney+ yn y DU 3.

-Diwedd-

Blŵi

Dydd Mawrth 30 Rhagfyr 2025, 07.30

Ar alw: ar S4C, S4C Clic a BBC iPlayer
Cynhyrchiad Stiwdio Ludo ar gyfer S4C, wedi'i ddybio gan Tinopolis

Nodiadau i olygyddion

Ffynonellau:

1: Nielsen. Honiad ffrydio Bluey yn seiliedig ar gyfanswm y gwylio a ddigwyddodd o Ionawr 2025 hyd at Fehefin 2025 (29/12/24 – 28/06/25) ac wedi'i restru ar gyfanswm munudau gwylio yn ôl Personau 2+. Cafwyd y data trwy Nielsen Streaming Content Ratings. Ffrydiau Bluey ar Disney+.

2: Techedge / AdvantEdge /BARB/Cenedlaethol, Pob Dyfais, DU, Cyrhaeddiad yn seiliedig ar 3+ munud o wylio parhaus, Unigolion 4+, Trwy'r Dydd, 1af Ebrill – 30ain Mehefin '25. CBeebies yn unig

3: Techedge / AdvantEdge /BARB/Cenedlaethol, Teledu yn Unig, DU, Cyrhaeddiad yn seiliedig ar 3+ munud o wylio parhaus, Unigolion 4+, Trwy'r Dydd, 1af Ebrill – 30ain Mehefin '25. Disney+ yn unig. Nid yw'r rhestrau'n cynnwys ffilmiau.

Mae Bluey wedi'i greu a'i ysgrifennu gan Joe Brumm a'i gynhyrchu gan Ludo Studio (sydd wedi ennill Gwobr Emmy®), ar gyfer ABC KIDS (Awstralia) a'i gyd-gomisiynu gan ABC Children's a BBC Studios Kids & Family. Wedi'i ariannu mewn cydweithrediad â Screen Australia, mae Bluey wedi'i greu, ei ysgrifennu, ei animeiddio a'i ôl-gynhyrchu 100% yn Brisbane Queensland, Awstralia, gyda chyllid gan Lywodraeth Queensland trwy Screen Queensland a Llywodraeth Awstralia. Mae BBC Studios Kids & Family yn dal yr hawliau dosbarthu a nwyddau byd-eang.

Yn Awstralia, caiff y sioe ei darlledu ar ABC. Mae'r gyfres yn cael ei darlledu a'i ffrydio i gynulleidfaoedd yn yr Unol Daleithiau a ledled y byd (y tu allan i Awstralia, Seland Newydd a Tsieina) ar draws Disney Channel, Disney Jr. a Disney+ trwy gytundeb darlledu byd-eang rhwng BBC Studios Kids & Family a Disney Branded Television.

Mae S4C yn ddarlledwr cyhoeddus; yr unig sianel deledu Gymraeg yn y byd. Mae S4C yn dosbarthu ystod eang o raglenni gan gynnwys drama, rhaglenni dogfen, newyddion, cerddoriaeth, adloniant, chwaraeon byw a rhaglenni plant. Mae cynnwys ar-lein yn cynnwys HANSH platfform unigryw gyda chynnwys wedi'i anelu'n bennaf at bobl ifanc 16-34 oed. Mae S4C Clic – chwaraewr S4C a gwasanaeth ar alw yn darparu cynnwys, dal i fyny, deunydd archif a setiau bocsys unigryw. Mae holl gynnwys S4C hefyd ar gael ar alw drwy BBC iPlayer.

Stiwdio o Awstralia yw Ludo Studio sydd wedi ennill gwobr BAFTA, Logie, Peabody a nifer o wobrau Emmy®, ac yn un o Gwmnïau Mwyaf Dylanwadol TIME yn 2024, sy'n creu ac yn cynhyrchu dramâu, animeiddio a straeon digidol gwreiddiol wedi'u sgriptio gan dalent leol anhygoel, eu dosbarthu'n fyd-eang a sy'n cael eu caru gan gynulleidfaoedd ym mhobman. Ludostudio.com.au

Adran Brandiau a Thrwyddedu BBC Studios yw'r grym gyrru wrth ymestyn Eiddo Deallusol BBC Studios trwy estyniadau brand arloesol, gan feithrin ymgysylltiad dwfn â chefnogwyr ledled y byd. Mae partneru ein brandiau eiconig - gan gynnwys Doctor Who a Bluey - â brandiau, hyrwyddwyr a chyhoeddwyr mwyaf y byd, yn tanio dychymyg cefnogwyr ac yn creu eiliadau cofiadwy o enwogrwydd brand. Mae ein portffolio amrywiol yn cwmpasu cynhyrchion defnyddwyr, adloniant byw, gemau a chyhoeddi, tra bod BBC Studios Digital yn gyrru dros 1 biliwn o ymweliadau'r mis, gan gynnig cyfleoedd hysbysebu a chynnwys brand. Gyda chefnogaeth timau arobryn, rydym yn canolbwyntio ar ddod o hyd i gyfleoedd gweledigaethol i wella effaith brand byd-eang a thwf digidol.

Mae BBC Studios Kids & Family yn rhan annatod o bwerdy cynnwys BBC Studios – is-gwmni masnachol o Grŵp y BBC sy'n cynhyrchu, buddsoddi a dosbarthu cynnwys yn fyd-eang.

Gyda gwybodaeth arbenigol am yr hyn sy'n ysgogi cynulleidfaoedd ifanc, mae BBC Studios Kids & Family yn nodi ac yn meithrin prosiectau gwych ac yn eu troi'n llwyddiannau byd-eang, gan fynd â chynnwys yn ddi-dor o'r syniad o'i greu, ei ddatblygu a'i gynhyrchu i fuddsoddi, rheoli masnachfraint a dosbarthu.

Mae portffolio aml-genre'r adran yn cynnwys rhai o'r masnachfreintiau mwyaf cyffrous a llwyddiannus yn y byd gyda chrefft ac adrodd straeon sydd wedi ennill BAFTA ac Emmy Rhyngwladol, gan gynnwys Bluey, Hey Duggee, Hey Duggee's Squirrel Club, y gyfres Deadly gyda Steve Backshall, Andy's Amazing Adventures a Supertato.

Mae rhestr gynyddol yr adran hefyd yn cynnwys Crookhaven, The Primrose Railway Children, My Friend Maisy, Rafi the Wishing Wizard, Stan Can, Peter & The Wolf,

a Pickle Storm, yn ogystal â sioeau poblogaidd a sioeau eiconig fel Blue Peter, The Dumping Ground, JoJo & Gran Gran, The Beaker Girls, Lagging a'r llinyn 'CBeebies Presents' gan gynnwys Shakespeare at the Globe a'r panto Nadolig blynyddol.

Mae ei gynyrchiadau'n cael eu darlledu ar sianeli a llwyfannau cynnwys blaenllaw ledled y byd gan gynnwys CBeebies, CBBC, Disney, ABC Awstralia, Tencent China, Nickelodeon a Netflix.