Glyn Ebwy sydd wedi eu coroni'n bencampwyr Uwch Gynghrair Principality 2016. 'Dydy pethau ddim wedi bod yn hawdd iddyn nhw ond wrth wella ar eu perfformiad y tymor diwethaf fe lwyddodd y Gwyr Dur i amddifadu Pontypridd o'u tlws ar Heol Sardis.
Ar ôl teithio i gartref enillwyr Cwpan Swalec SSE, Llanymddyfri, yn y rownd gyn-derfynol, bu raid i Wyr Gwent ddychwelyd i Heol Sardis am yr ail dymor yn olynol ar gyfer y ffeinal, er mwyn herio Pontypridd - tim a oedd yn chwilio am eu pumed tlws yn olynol.
Ond dan arweiniad chwaraewr Uwch Gynghrair y tymor, Ronny Kynes, a groesodd am ddau o bum cais ei dîm, daeth buddugoliaeth gwerthfawr 38-12 i Glyn Ebwy - eu tlws cenedlaethol cyntaf ers iddynt gael eu coroni'n Bencampwyr Answyddogol Cymru am y pedwerydd tro yn 1959/60.
Roedd Pontypridd yn chwilio am eu pumed tlws yn olynol er mwyn ychwanegu at Gwpan Her Foster enillon' nhw yn erbyn Bedwas yn gynharach yn y tymor. Roedden nhw am fynd un yn well na record pedwar tlws Uwch Gynghrair Castell-nedd.
Ond cyrhaeddodd Glyn Ebwy gyda'r bwriad o dalu'r pwyth yn ol wedi iddyn nhw gael eu trechu y tymor diwethaf yn yr un lleoliad . Aeth yr ymwelwyr ar y blaen gyda'u hymosodiadau prin, pwrpasol ac yn syml iawn, 'doedd gan y tîm cartref ddim ateb i'w grym na'u hamddiffyn cadarn.
"Dod yma ac ennill yn erbyn tîm da iawn sydd wedi cipio'r pedwar tlws diwethaf. Bachu buddugoliaeth yn y modd mwyaf anrhydeddus yma ar Heol Sardis, mae'n hollol wych," cyfaddefodd prif hyfforddwr Glyn Ebwy Nigel Davies.
"Mae pawb wedi eu hysbrydoli o fewn y garfan, ac mae'n wefreiddiol. Dyna sy'n mynd a chi dros y llinell.
"Mae'r chwaraewyr i gyd wedi gweithio'n galed iawn, ac maent wedi dangos penderfyniad aruthrol yn eu hawydd i ennill. Daeth hynny'n amlwg yn ystod yr hanner cyntaf pan mai dim ond amddiffyn fu raid i ni'i wneud. Cadwodd y bechgyn eu pennau, parhau i daclo ac yn y pendraw 'doedd gan Ponty unman i fynd."
"Roedd llawer o brofiad yn y garfan ar ôl bod i'r rownd derfynol y tymor diwethaf ac fe ddefnyddiodd y bechgyn hynny er mwyn creu momentwm i fynd â ni dros y llinell gais. Bydd y fuddugoliaeth hon yn golygu popeth i'r chwaraewyr, ond hefyd i gefnogwyr Glyn Ebwy, sydd wedi bod ffantastig drwy gydol y tymor."
