Dysgu Cymraeg

Croeso i S4C! Neu groeso'n ôl, os dych chi wedi bod bant am sbel.

Os dych chi'n cymryd eich camau cyntaf i ddysgu Cymraeg, eisiau gwella eich sgiliau yn yr iaith, neu'n chwilfrydig, 'dyn ni wrth ein boddau eich bod chi wedi ymuno â ni ar yr unig sianel deledu Gymraeg yn y byd.

Ar y wefan hon mae'r holl wybodaeth dych chi angen i deimlo'n gartrefol gyda S4C.

Os bydd unrhyw beth arall fasai'n ddefnyddiol i chi, rhowch wybod!

Mae'n synnu llawer o bobl sy'n cymryd eu camau cyntaf yn y Gymraeg bod 'na diwylliant Cymraeg gwahanol a bywiog, sydd efallai yn hollol newydd i chi. 'Dyn ni'n gobeithio bod S4C yn gallu bod yn ddrws i chi i mewn i'r byd hwn, a byddwn ni'n trio'n galed i'ch helpu pan fyddwch chi'n cychwyn ar eich taith.

O Duolingo i Memrise a thu hwnt, mae pob math o apiau a gwefannau ardderchog ar gael ar y we i'ch helpu i ddysgu Cymraeg. Mae S4C yma i chi ar bob cam o'ch taith chi, a bydd ein rhaglenni yn eich helpu chi i ddod i adnabod a mwynhau holl seiniau, acenion a thafodieithoedd ein hiaith brydferth. 'Dyn ni ddim yn darparu cwrs Cymraeg penodol – mae'n well gennym ni adael hynny i'r arbenigwyr – ond byddwn ni'n gwneud popeth sy'n bosibl i ddarparu cynnwys i'ch cefnogi chi.

Os dych chi'n dod aton ni fel eich cam cyntaf, efallai byddwch chi eisiau ymweld â'n partneriaid bendigedig, sy'n cynnig cyrsiau ac adnoddau i'ch helpu chi i ddysgu, lle bynnag yn y byd dych chi.

Yn y lle cyntaf, mae sianel teledu gyda ni sy'n darlledu 18 awr y dydd, bob dydd. Gydag amrywiaeth eang o gynnwys mae yna wirioneddol rhywbeth i bawb.

Mae'r holl raglenni wedyn ar gael i'w gwylio ar alw ar S4C Clic a/neu BBC iPlayer.

Mae yna wybodaeth ar ein gwefan yma i'ch helpu chi i ddod i adnabod y cynnwys ac i benderfynu lle dych chi am ddechrau gwylio.

Wedyn, mae cynnwys arbennig i chi ar ein cyfryngau cymdeithasol. Dyma fideos byr i gefnogi eich dysgu – perffaith i'w gwylio tra eich bod chi'n gwneud paned neu aros am y bws! Dilynwch ni ar YouTube, Instagram, X neu TikTok i gael cynnwys newydd drwy'r amser.

Os dych chi eisiau awgrymiadau o bethau i'w gwylio – yn ogystal â geiriau defnyddiol, gwybodaeth ar bobl adnabyddus, a mwy – cofrestrwch am ein cylchlythyr dysgu Cymraeg. Byddwch yn derbyn e-bost bob mis, gyda Chymraeg syml ar un ochr a'r Saesneg ar yr ochr arall, felly cyfle i chi ymarfer darllen ar yr un pryd!

Mae yna fwy o wybodaeth ar ein gwefan yma.

Mae gwylio a darllen y newyddion yn ffordd wych i ddysgu a gwella sgiliau Cymraeg – mae'n gyfle i ddefnyddio tipyn bach o Gymraeg bob dydd. Ar ein gwefan ac app Newyddion S4C (Apple iOS ac Android) mae tab "Dysgu Cymraeg", gyda chymorth ychwanegol i ddysgwyr.