Addysg
Mae ein dull gweithredu wedi'i wreiddio mewn cred syml: mae S4C i bawb. Rydym wedi ymrwymo i ysbrydoli, cynrychioli a chysylltu pobl ledled Cymru; rydym yn rhoi pwyslais ar hygyrchedd a chynhwysiant, gan sicrhau bod pob dysgwr yn gweld eu hunain yn cael eu hadlewyrchu yn yr hyn rydyn ni'n ei greu a'r straeon rydyn ni'n eu hadrodd.
Mae ein Tîm Pwrpas Cymdeithasol yn chwarae rhan weithredol wrth gefnogi’r twf yn y nifer o siaradwyr Cymraeg, gyda phwyslais cryf ar berthnasedd yn y byd go iawn.
Ein gweledigaeth
Byddwn yn ceisio cefnogi addysg yng Nghymru drwy:
- Bod yn arweinydd ym maes adloniant Cymraeg i blant a phobl ifanc.
- Cefnogi'r defnydd o'n cynnwys mewn ystafelloedd dosbarth a gan ddysgwyr annibynnol ledled Cymru.
- Chwarae rhan ganolog wrth ddatblygu siaradwyr Cymraeg hyderus mewn byd digidol.
- Hwyluso profiadau dysgu rhyngweithiol, sy’n cyd-fynd â'r cwricwlwm, yn seiliedig ar ein cynnwys.
Cyfleoedd a Chymorth Profiad Gwaith
Mae cefnogi talent y dyfodol yn bwysig i ni oherwydd mae'n helpu pobl ifanc i weld eu hunain yn y cyfryngau, yn tynnu sylw at werth sgiliau Cymraeg, ac yn ein galluogi i fuddsoddi yn y genhedlaeth nesaf o'n gweithlu.
Rydym hefyd yn gweithio mewn partneriaeth â sefydliadau allweddol ledled Cymru i helpu i sicrhau bod gan bobl ifanc wybodaeth glir am lwybrau perthnasol i'r diwydiant.
Y sector cynhyrchu
Mae S4C yn gorff comisiynu, sy'n golygu nad ydym yn cynhyrchu cynnwys ein hunain: mae'r rhaglenni a'r cynnwys a welwch ar ein platfformau a'n sianeli yn cael eu gwneud gan gwmnïau cynhyrchu ledled Cymru.
Os ydych chi'n chwilio am y cyfleoedd profiad gwaith hyn (e.e. bod ar set; rolau technegol fel camera neu golur; rolau cynhyrchu fel golygu neu gyfarwyddo) rydym yn awgrymu eich bod yn cysylltu â chwmnïau cynhyrchu yn uniongyrchol.
Profiad gwaith gydag S4C
I'r rhai sy'n 18 oed neu’n hŷn a sydd â diddordeb mewn profiad gwaith mewn adrannau megis cyfreithiol neu ariannol, pobl a diwylliant, hyrwyddo (gan gynnwys cyfathrebu, marchnata a chyfryngau cymdeithasol), gwasanaethau mynediad ac archifo, rydym yn cynnig lleoliadau tair gwaith y flwyddyn.
Ymweliadau Allgymorth Addysgol ar gyfer Ysgolion a Cholegau
Rydym yn cynnig ymweliadau allgymorth addysgol sy'n arddangos cynnwys S4C ac yn helpu i feithrin cysylltiad â'r Gymraeg a pherchnogaeth ohoni. Mae'r rhain yn canolbwyntio ar feysydd blaenoriaeth allweddol sy'n cyd-fynd ag Adnodd: llythrennedd, tegwch a gwrth-hiliaeth, a lles.
Mae pob sesiwn yn defnyddio cynnwys S4C, wedi'u teilwra i bob lleoliad ac yn cynnwys gweithgareddau hwyliog sydd wedi'u cynllunio i gael yr ymgysylltiad gorau. Ein nod yw creu profiadau cynhwysol, cofiadwy sy'n creu cyswllt gwerth chweil rhwng cynnwys S4C, addysg a hunaniaeth .
Rydym yn anelu at gyrraedd pob rhan o'r wlad, a blaenoriaethu ysgolion a cholegau nad ydym wedi ymweld â nhw o'r blaen a/neu sydd mewn ardaloedd o amddifadedd economaidd-gymdeithasol uwch. Byddwn hefyd yn ymweld ag ysgolion cyfrwng Saesneg i gefnogi eu datblygiad o'r Gymraeg.
I ofyn am ymweliad allgymorth addysgol, llenwch y ffurflen hon.
Adnoddau Addysgol
Mae gennym sianel ffrydio bwrpasol ar S4C ar Hwb, gwefan Llywodraeth Cymru, lle gall pob ysgol, athro a disgybl gael mynediad cyflym a hawdd at ystod eang o gynnwys sy'n gysylltiedig â'r cwricwlwm. Cymerwch olwg ar Hwb i weld pa raglenni a chynnwys y gorffennol a'r presennol y gallwch eu ffrydio fel rhan o'ch cwricwlwm. Gallwch hefyd ddod o hyd i’n cynnwys ar S4C Clic, BBC iPlayer a'n sianeli cyfryngau cymdeithasol.
Cadwch mewn cysylltiad
Cliciwch yma i ymuno â'r rhestr ddosbarthu ar gyfer ein cylchlythyr tymhorol, sydd â gwybodaeth am gynnwys newydd sy'n addas ar gyfer ysgolion yn ogystal ag enghreifftiau o rywfaint o'r gwaith rydym wedi bod yn ei wneud.
Unrhyw gwestiynau, cysylltwch ag amrywiaeth@s4c.cymru.