Pobl a Phartneriaid

Mae S4C yn fwy na sianel deledu – mae'n asgwrn cefn i ddiwylliant cyfoes Cymru ac yn rym creadigol sy'n bywiogi'r iaith Gymraeg. Tu hwnt i'n gwaith i greu cynnwys gwych rydym yn gweithio gyda phartneriaid ledled Cymru er mwyn meithrin talent, cefnogi cymunedau a chroesawu lleisiau Cymraeg o bob cefndir. Ar y dudalen hon mae gwybodaeth am y cyfleoedd gyrfa rydym yn eu cefnogi - camau cyntaf, camau ymlaen a datblygiad proffesiynol parhaus; rhai o'r partneriaid rydym yn gweithio gyda nhw er mwyn gwella hygyrchedd a thegwch yn ein diwydiant; a rhai o'r digwyddiadau diwylliannol rydym ni'n eu noddi.

Hyfforddiant

Mae S4C yn cefnogi nifer o gyfleoedd hyfforddi gan bartneriaid allanol i sicrhau bod gan bawb y cyfle i gamu i’r byd cynhyrchu teledu a datblygu sgiliau hanfodol wrth i ni drawsnewid i fod yn ddarlledwr digidol-yn-gyntaf.

Comedy Lab Cymru
Mae S4C a Channel 4 yn partneru gyda chwmni Little Wander ar y cynllun hwn sy'n cynnig cyfleoedd datblygu a mentora i ysgrifenwyr a pherfformwyr comedi newydd.
Cynghrair Sgrin Cymru
Pwrpas Cynghrair Sgrin Cymru yw datblygu gweithlu sgrin y dyfodol, ac mae S4C yn falch o gefnogi eu gwaith gydag ysgolion ledled Cymru trwy gyfrwng y Gymraeg.
Hansh - Dim Sbin
Rhaglen hyfforddi newyddiaduron y dyfodol trwy gyfrwng y Gymraeg yw Hansh Dim Sbin, cynllun sy'n bodoli ers 2017. Pob hydref mae cyfle i ddau o bobl gael deg mis o waith llawn amser, wedi'i dalu, ar dîm newyddion Cymraeg ITV ac arwain ar gynnwys cyfryngau cymdeithasol i blatfformau Hansh Dim Sbin.
Cynllun Carlam Ffeithiol Cymru
Bob blwyddyn, mae'r cynllun Carlam Ffeithiol yn rhoi cyfleoedd i bobl sy'n gweithio yn y maes cynhyrchu ffeithiol gael y gefnogaeth, hyfforddiant a phrofiad gwaith sydd angen arnyn nhw fynd i’r lefel nesaf yn eu gyrfaoedd. Diolch i S4C mae dau o lefydd ar y cynllun yn cael eu clustnodi i bobl â sgiliau cyfathrebu cryf yn y Gymraeg.
TAC
Mae'r bartneriaeth rhwng S4C a TAC yn ein galluogi i ddatblygu sgiliau yn y sector cynhyrchu, a hynny trwy gyfrwng y Gymraeg. Rydym ni'n gweithio gyda'n gilydd er mwyn sicrhau ein bod ni'n ymateb at anghenion penodol y sector.
It's My Shout
Cwmni cynhyrchu annibynnol yw It's My Shout, sy'n cynnig cyfleoedd hyfforddiant i bobl o bob cefndir gael blas o weithio yn y diwydiant ffilm. Mae S4C yn comisiynu pedair ffilm fer yn y Gymraeg bob blwyddyn, ac yn cefnogi yn ymarferol.
Bwrsariaeth Darlledu Chwaraeon
Dyma gyfle arbennig i rywun sy'n dod o gefndir sydd wedi’i dangyrychioli yn y sector ddilyn cwrs MSc Darlledu Chwaraeon ym Mhrifysgol Metropolitan Caerdydd. Mae'r Fwrsariaeth yn cynnwys ffi'r cwrs yn ogystal â phrofiad gwaith gyda'n partneriaid cynhyrchu.
Ysgoloriaeth Newyddiaduraeth
Mae ein Hysgoloriaeth Newyddiaduraeth yn cynnig cymorth ariannol, profiad gyrfa ymarferol a chyfleoedd gwaith i fyfyrwyr ar gwrs MA mewn Newyddiaduraeth Ddarlledu yn Ysgol Newyddiaduraeth, y Cyfryngau a Diwylliant (JOMEC), Prifysgol Caerdydd. Dyma gyfle rhagorol y gallai agor drysau i fyd Newyddiaduraeth Gymraeg.
NFTS Cymru
Mae Bwrsariaeth S4C ar gael i fyfyriwr Cymraeg sydd wedi ennill lle ar gwrs NFTS ond angen cymorth ariannol er mwyn astudio’r cwrs.
Gwobr Goffa Dai Llanilar
Drwy Wobr Goffa Dai Jones Llanilar, mae S4C a’r Gymdeithas Amaethyddol yn rhoi cyfle i berson ifanc i weithio gyda chwmnïau cynhyrchu Telesgop a Slam i ddatblygu syniad gwreiddiol i fod yn eitem gyflawn, sydd wedyn yn cael ei darlledu ar blatfformau S4C.
ScreenSkills
Mae S4C yn cyfrannu at y cronfa di-sgript ScreenSkills, sy’n sicrhau bod hyfforddiant ansawdd uchel ar gael i bawb yn y sector yma yng Nghymru.
Into Film
Mae Canfod yn gynllun gan Into Film ar gyfer gyrfaoedd creadigol yng Nghymru – rhaglen arbennig o ddigwyddiadau ar-lein ac wyneb yn wyneb sy’n rhoi’r cyfle i bobl ifanc gael blas a dysgu am yr ystod o swyddi a llwybrau gyrfaol sydd ar gael o fewn y sector greadigol.

Partneriaid

Mae cydweithio i wneud i Gymru ffynnu yn un o sylfeini strategaeth S4C, Mwy Na Sianel Deledu, ac mae S4C yn cefnogi sawl partner allweddol, boed hynny’n ariannol neu’n ymarferol.

Anabledd Cymru
Mae S4C yn falch o gefnogi gwaith Anabledd Cymru, sy'n ymgyrchu dros hawliau a chydraddoldeb pobl ag anableddau.
Disability Arts Cymru
Ymhlith nifer o bethau eraill, mae Celfyddydau Anabledd Cymru yn datblygu talent greadigol anabl a Byddar, ac mae S4C yn falch o fod yn aelod cyswllt ohono.
Cysylltu Diwylliant Cymru
Menter sy'n dod â thalent amrywiol yn y sector ffilm a theledu yng Nghymru at ei gilydd yw Culture Connect Wales, ac mae S4C yn cefnogi yn ariannol ac yn ymarferol.
TV Access Project (TAP)
Mae S4C yn aelod cyswllt o’r prosiect hwn, sy'n gweithio i sicrhau bod y diwydiant teledu yn hygyrch ar gyfer pobl anabl.
Arise
Mae Arise yn brosiect wedi’i rhedeg gan sefydliad celf Fio sy'n datblygu pobl greadigol o'r Mwyafrif Byd-eang, ac mae S4C yn hapus i ddarparu arbenigedd a chyfleoedd datblygu sgiliau Cymraeg.
Newyddion i Bawb
Rydym yn gyffrous iawn i gefnogi'r prosiect hwn, sy'n gweithio gyda chymunedau lleol (ym Mhlaenau Ffestiniog yn ystod 2025/26) i ymchwilio beth mae pobl ei angen o newyddiaduraeth ac i greu modelau newydd i rannu gwybodaeth gyhoeddus.
Bafta Cymru
Mae S4C yn un o gefnogwyr craidd BAFTA Cymru, ac rydym yn falch iawn o ddathlu’r dalent sgrîn orau yng Nghymru, a hybu creadigrwydd, cyfleoedd a chymuned yn ein diwydiant.
BAFTA Albert
Mae S4C yn aelod o gonsortiwm Albert, partneriaeth sy’n ein cynorthwyo ymgorffori cynaliadwyedd fel rhan annatod o’r proses gynhyrchu y cynnwys yr ydym ei comisiynu.
Cymru Greadigol
Drwy ein Memorandwm o Gyd-ddealltwriaeth, rydym yn falch o gydweithio gyda Cymru Greadigol, gan gefnogi talent a chreu cyfleoedd newydd sy’n hybu creadigrwydd a chynhyrchu cynnwys gwych yng Nghymru.
Ffilm Cymru
Ar y cyd, rydym yn cefnogi Sinema Cymru – cynllun sy’n datblygu talent a chynyrchiadau ffilm Cymraeg, gan gefnogi timoedd creadigol i wireddu eu syniadau a datblygu eu sgiliau.
Y Ganolfan Dysgu Cymraeg Genedlaethol
Mae’r Ganolfan Dysgu Cymraeg Genedlaethol yn bartner holl bwysig yn ein gwaith cefnogi dysgwyr Cymraeg ledled Cymru a thu hwnt.
RTS
Mae S4C yn un o brif gefnogwyr yr RTS, gan ddathlu’r gorau o’r diwydiant teledu, cefnogi talent newydd, annog creadigrwydd a chrefft, ac helpu i gryfhau’r gymuned greadigol sy’n gwneud ein diwydiant mor fywiog ac amrywiol.
Bardd Plant Cymru
Rydym yn cefnogi prosiect Bardd Plant Cymru – rôl sy’n ysbrydoli a thanio dychymyg plant ar draws Cymru drwy weithdai a phrosiectau barddonol amrywiol.

Nawdd

Un o amcanion S4C yw i ehangu gwylio gyda’n cynnwys, a drwy gefnogi llawer o ddigwyddiadau ar hyd y flwyddyn, rydym yn cyrraedd cynulleidfaoedd newydd ac yn dathlu amrywiaeth ymhob ffordd.

Pride Cymru
Mae S4C yn falch o gefnogi Pride Cymru, ac yn gorymdeithio bob blwyddyn gyda'n staff, partneriaid cynhyrchu, a'n ffrindiau a theuluoedd.
Gwobr Iris
Trwy gefnogi Gŵyl Iris ac Iris ar Grwydr mae S4C yn helpu hyrwyddo ffilmiau byrion LHDTC+ yn y Gymraeg sy'n cael eu gwylio dros y DU a thu hwnt.
Gwobrau Cerddoriaeth Gymreig Ddu
Mae'r Gwobrau Cerddoriaeth Du Cymreig yn dathlu rhagoriaeth mewn cerddoriaeth o darddiad Du, gan gynnwys caneuon trwy gyfrwng y Gymraeg, ac mae S4C yn falch o noddi.
Dangos y Cerdyn Coch i Hiliaeth
Mae Dangos y Cerdyn Coch i Hiliaeth yn gwneud gwaith arbennig a phwysig mewn ysgolion dros Gymru. Mae S4C yn noddi gwobrau ar gyfer prosiectau Cymraeg a dwyieithog.
Tafwyl
Yn ogystal â dod â holl gyffro Tafwyl i Gymru gyfan trwy ein cynnwys, rydym yn falch iawn o noddi'r digwyddiad, sy'n gwneud y gwaith pwysig o godi ymwybyddiaeth o'r Gymraeg, a'n cerddoriaeth gyfoes fendigedig, yng Nghaerdydd a thu hwnt.
Eisteddfod Genedlaethol
Yn uchafbwynt ein blwyddyn ddiwylliannol, mae'r Eisteddfod Genedlaethol yn drysor i ni gyd. Mae gan S4C bresenoldeb mawr ar y maes bob blwyddyn, ac mae'n harlwy o'r digwyddiad yn tyfu o hyd, ond rydym ni'n falch hefyd o'i gefnogi yn ariannol.
Eisteddfod yr Urdd
Mae Eisteddfod yr Urdd yn ddigwyddiad pwysig iawn i ni, gan fod plant yn flaenoriaeth ymhlith ein cynulleidfaoedd. Yn ogystal â noddi'r ŵyl, rydym yn cynnal digwyddiadau arbennig trwy'r wythnos ar draws y maes ac ar ein stondin.
Y Sioe Frenhinol
Rydym yn falch o noddi y Sioe, un o ddigwyddiadau mwyaf Cymru, a rhannu’r holl gyffro gyda chynulleidfaoedd ledled y wlad. Drwy ein cynnwys a’n presenoldeb ar y maes, rydym yn dathlu’r gorau o amaeth, crefft a diwylliant Cymru, ac yn cefnogi digwyddiad sy’n dod â’n cymunedau gwledig ynghyd bob blwyddyn.