9 Hydref 2025

Mae S4C a Chyngor Celfyddydau Cymru yn gwahodd ceisiadau gan gwmnïau cynhyrchu sydd â diddordeb mewn creu ffilm ddogfen ffurf hir am y celfyddydau yng Nghymru.

Manylion Allweddol:

• Ffilm ddogfen ffurf hir (hyd rhwng 70 a 90 munud) ac yn addas ar gyfer sinema ac oriau brig S4C.
• Cyllideb hyd at £130,000.
• Croesawn pob math o ffurfiau celfyddydol, gan gynnwys rhai sydd fel arfer heb eu cynrychioli’n aml mewn dogfennau Cymraeg. Gall y syniadau fod yn ymwneud â chelfyddydau Cymru yn rhyngwladol.
• Gall y testun fod yn bortread o awdur neu artist, yn agwedd ar lenyddiaeth, cerddoriaeth, dawns neu theatr, neu yn unrhyw elfen arall sy’n taflu goleuni ar y gorau o’n celfyddydau.
• Bydd syniadau sy’n cynnwys amrywiaeth a lleisiau newydd neu leiafrifol yn cael eu hannog.
• Byddwn yn ffafrio  pynciau cyfoes, ond gellir hefyd ystyried triniaeth hanesyddol.
• Rydym yn chwilio am dalent cryf, straeon unigryw a thriniaethau beiddgar.
• Mae angen cyfleu’r cynnwys Tachwedd 2026 fan hwyraf, er mwyn galluogi amser i’r cynnwys ddangos mewn cinemau cyn darlledu.

Gofynion Ychwanegol:

• Disgwylir ymdriniaeth greadigol a diffiniol o’r pwnc.
• Syniad pendant o naws ac arddull y ffilm.
• Dylai pob cynnig gynnwys cynllun dosbarthu a dangosiadau – gan gynnwys dangosiadau sinema, a dangosiadau mewn amryw o wyliau.
• Gwybodaeth am y tîm creadigol allweddol a'ch profiad
• Wrth ymgeisio dylid ystyried oblygiadau cytundebol ar y cynnwys fydd yn byw yn ddarllediad llinol ac ar S4C Clic a BBC iPlayer.

Cyllideb

Hyd at gyfanswm o £130,000

Sut i gyflwyno syniad?

Os oes gennych ddiddordeb, bydd angen cyflwyno’r syniad drwy’r Cwmwl at sylw Llinos Wynne cyn 12:00 dydd Mawrth 25 Tachwedd 2025.

Gall pob cwmni gyflwyno hyd at 2 syniad felly rydym yn awgrymu’ch bod yn trafod diddordeb yn y syniad gyda Llinos Wynne ymlaen llaw. Dylid cyflwyno’r ddau syniad ar wahan ar y Cwmwl.

Gwybodaeth Ychwanegol

Bydd ffenest o 6 mis rhwng y dyddiad cyfleu a’r dyddiad cyhoeddi er mwyn galluogi cyfnod o ddangosiadau mewn gwyliau a sinemau.

Mae gwefan gynhyrchu S4C yn cynnig gwybodaeth ddefnyddiol gan gynnwys gwybodaeth dechnegol, gytundebol a chyfleu os oes cwestiwn am y prosesau cynhyrchu gennych.

Bydd cynrychiolydd o’r Cyngor Celfyddydau yn rhan o’r broses ddarllen gychwynnol ac yn cynnig mewnbwn.

Mae'n fwriad gan Llion Iwan, Llinos Wynne a’r Cyngor Celfyddydau ddewis rhestr fer erbyn dechrau Ionawr 2026 - cedwir yr hawl i addasu'r amserlen a hysbysir ein bwriad drwy e-bost.

Os byddwch yn llwyddiannus bydd S4C yn gweinyddu’r broses gomisiynu drwy’r llwybr arferol. Bydd angen trafod y gyllideb a’r manylion cytundebol gyda’r adran Materion Busnes, ac i'r syniad gael ei roi ar system gomisiynu S4C – Cwmwl. Ni ddylid gwneud hyn cyn cael gwahoddiad i wneud.

Cedwir yr hawl i beidio â chomisiynu unrhyw un o'r cynigion a ddaw i law.

Edrychwn ymlaen yn fawr at dderbyn eich cynigion.