23 Mai 2010

    Enillodd rhaglenni S4C 14 o wobrau yn seremoni wobrwyo BAFTA Cymru gan gynnwys yr actor gorau, yr actores orau, y cyfarwyddwr gorau a’r awdur gorau ar gyfer y sgrin.

Cyflwynwyd un o wobrau arbennig y noson Gwobr Gwyn Alf Williams i’r rhaglen ddogfen Dwy Wraig Lloyd George, a gynhyrchwyd gan Tinopolis ac a gyflwynwyd gan Ffion Hague.

Enillodd y ffilm Ryan a Ronnie, a gynhyrchwyd gan Boomerang Plus, bedair gwobr gan gynnwys yr actor gorau i Aled Pugh am ei bortread o’r diddanwr Ryan Davies, yr awdur gorau ar gyfer y sgrin i Meic Povey a’r cyfarwyddwr gorau:drama i Rhys Powys.

Eiry Thomas, a gymerodd ran Jane Jones yn y ddrama bwerus, Cwcw enillodd y wobr am yr actores orau. Enillodd y ffilm, a wnaethpwyd gan Fondue Films, y wobr am y trac sain gerddorol wreiddiol orau hefyd.

Enillodd y ddrama ddogfen Carwyn, am fywyd Carwyn James a’r ffilm Ar y Tracs a sgriptiwyd gan Ruth Jones o Gavin and Stacey ddwy wobr yr un. Cipiodd Ar y Tracs, cynhyrchiad Tidy Productions a Greenbay Media, y sain gorau a’r gwisgoedd gorau. Enillodd Carwyn y cyfarwyddwr gorau i Dylan Richards a’r ddrama ddogfen orau.

Meddai Rhian Gibson, Cyfarwyddwr Comisiynu S4C, “Rydw i’n falch iawn fod cynifer o raglenni S4C wedi ennill yng Ngwobrwyon BAFTA Cymru eto eleni. Mae’n deyrnged ddisglair i ymroddiad a gallu ein sector cynhyrchu bod cymaint o’n rhaglenni wedi llwyddo ar y noson. Hoffwn eu llongyfarch i gyd am eu llwyddiant.”

Gwobrau S4C yn llawn:

Yr Adloniant Ysgafn Gorau

Dudley – Pryd o Sêr (Rondo Media)

Y Sain Gorau

Ar y Tracs (Tidy Productions/Green Bay Media)

Y Trac Sain Gerddorol Wreiddiol Orau

Cwcw (Fondue Films)

Y Rhaglen Ddogfen/Ddrama Ddogfen Orau

Carwyn (Green Bay Media)

Y Cyfarwyddwr Ffotograffiaeth Gorau: Drama

Ryan a Ronnie (Boomerang Plus)

Y Cyfarwyddwr Goleo Gorau – Dim Camera

Cyngerdd Dathlu Karl Jenkins (Rondo Media)

Yr Awdur Gorau ar gyfer y Sgrin

Ryan a Ronnie – Meic Povey (Boomerang Plus)

Y Gwisgoedd Gorau

Ar y Tracs (Tidy Productions/Green Bay Media)

Teitlau Gorau

Y Daith (Rough Collie)

Gwobr Gwyn Alf Williams

Dwy Wraig Lloyd George (Tinopolis)

Y Cyfarwyddwr Gorau: Drama

Ryan a Ronnie – Rhys Powys (Boomerang Plus)

Y Cyfarwyddwr Gorau

Carwyn – Dylan Richards (Green Bay Media)

Yr Actor Gorau

Ryan a Ronnie – Aled Pugh (Boomerang Plus)

Yr Actores Orau

Cwcw – Eiry Thomas(Fondue Films)