Teyrngedau

2026-2027

• 1 Mehefin 2026

  Teyrnged i'r diweddar Robin Evans

  Dywedodd Llion Iwan, Prif Swyddog Cynnwys S4C: 

  “Roedd Robin Evans fel dewin, yn troi popeth roedd yn ei gyffwrdd i aur. O’r bandiau cerddorol rhyfeddol o boblogaidd i gynyrchiadau teledu di-rif dros ddeugain mlynedd. O bosib ei waddol mwyaf yw’r gyfres Rownd a Rownd sydd wedi dod â gymaint o fwynhad i genedlaethau. 

  "Trwy weithio efo fo deuthum  i adnabod y cymeriad cynnes a mor barod i dynnu coes gyda hiwmor sych ac roedd ei sylw at fanylder yn ei gynyrchiadau o’r radd flaenaf. Dysgais dipyn ganddo. Roedd ei ddewrder at y diwedd yn rhyfeddol a nodweddiadol o’i gymeriad. Cydymdeimlad dwys at ei wraig Heulwen a’u plant Llio a Huw.”

• 22 Mai 2026

  Teyrnged i Eilir Jones

  Hoffai S4C estyn cydymdeimlad dwys gyda theulu Eilir Jones sydd wedi marw. Roedd yn beiriannydd llun uchel ei barch ac yn wyneb cyfarwydd ar gynyrchiadau allanol a mewnol led led Cymru ers dros deng mlynedd ar hugain. 

  Rydym yn cydymdeimlo gyda’i wraig Catrin a Nel a Nanw.

2024-2025

• 13 Mehefin 2025

  Teyrnged S4C i Richard Longstaff

  Dymuna S4C estyn cydymdeimlad gyda theulu Richard Longstaff o Ddinbych a fu farw ddoe, 12fed Mehefin.

  Roedd Richard yn wr camera profiadol ac wedi gweithio ar bob cyfres Garddio a Mwy tan y llynedd, gan chwarae rhan allweddol yn ei chadw ar y sgrin trwy'r pandemig.

  Fe weithiodd ar nifer fawr o raglenni a chyfresi ar S4C ers blynyddoedd maith, Y Fenai a Byw yn yr Ardd ymysg y rheiny.

  Mae'n cydymdeimlad dwys gyda ei wraig Llinos a'u plant Harri ac Emma.

• 28 Mai 2025

  Teyrnged S4C i Annette Bryn Parri

  Dywedodd Llion Iwan, Prif Swyddog Cynnwys S4C:

  "Mae'n drist clywed fod y gyfeilyddes Annette Bryn Parri wedi marw.

  "Gwnaeth gyfraniad arbennig i ddiwylliant Cymru gan gyfrannu i nifer o raglenni dros y degawdau wrth gyfeilio cantorion fel Syr Bryn Terfel.

  "Estynwn ein cydymdeimlad dwys gyda'i theulu yn sgil eu profedigaeth."

• 

  22 Awst 2024

  S4C yn talu teyrnged i'r cerddor, actor a'r awdur Dewi 'Pws' Morris

  Roedd Dewi yn gymeriad unigryw ac yn berfformiwr amryddawn wnaeth gyfraniad eang i S4C a diwylliant Cymraeg.

  Fel aelod o'r bandiau blaenllaw Y Tebot Piws ac Edward H Dafis, daeth Dewi Pws i amlygrwydd cenedlaethol. A daeth yn fuddugol yn y gystadleuaeth Cân i Gymru ym 1971 gyda'r gân boblogaidd Nwy yn y Nen.

  Ond gyda dawn actio a direidi naturiol, gwnaeth ei farc ar sawl cynhyrchiad eiconig i S4C hefyd. Roedd yn adnabyddus fel Wayne Harries, un o gymeriadau cyntaf Pobol y Cwm o 1974 hyd at 1987 a'r ffilm gomedi Grand Slam ym 1978. A bydd cenedlaethau o blant Cymru yn ei gofio'n gynnes fel y Dyn Creu yn y gyfres Miri Mawr ac fel Islwyn Morgan yn yr opera sebon Rownd a Rownd.

  Roedd ei dalent ar sgrin ac i fywyd yng Nghymru yn amhrisiadwy a bu'n arwr ac yn ysbrydoliaeth i nifer ohonom yn ein plentyndod. Roedd yn un o'n cewri creadigol fel cenedl a bydd colled mawr ar ei ôl.

  Mae ein meddyliau gyda'i wraig, Rhiannon, a'i deulu a'i ffrindiau, wrth i ni ddiolch am ei gyfraniad unigryw i S4C dros y degawdau.

2022-2023

• 23 Mawrth 2023

  S4C yn rhoi teyrnged i Dafydd Hywel

  Meddai Llinos Griffin-Williams Prif Swyddog Cynnwys S4C:

  "Gyda thristwch, clywsom am farwolaeth yr actor amryddawn Dafydd Hywel. Mae ei gyfraniad i fyd y ddrama yng Nghymru yn aruthrol – ac roedd yn rhan o gynyrchiadau poblogaidd S4C yn actio mewn cyfresi fel Pobol y Cwm, Miri Mawr, Y Pris a Pen Talar ac mewn ffilmiau megis Rhosyn a Rhith, I Fro Breuddwydion a Rhag Pob Brad, i enwi dim ond rhai. Rydym yn cydymdeimlo â theulu a ffrindiau Dafydd yn eu colled, gan ddiolch iddo am ei gyfraniad arbennig."

• 15 Chwefror 2023

  S4C yn rhoi teyrnged i Christine Pritchard

  Wrth roi teyrnged i'r actores amryddawn Christine Pritchard, dywedodd y Prif Weithredwr Sian Doyle ar ran S4C:

  "Gyda thristwch mawr y clywsom ni am farwolaeth yr actores Christine Pritchard. Roedd ei thalent yn enfawr a bu'n rhan o gynyrchiadau mwyaf eiconig S4C yn chwarae cymeriadau mewn cyfresi fel Glas y Dorlan, Dinas, Pobol y Cwm, Pris y Farchnad, Talcen Caled ac yn fwy diweddar, Un Bore Mercher a 35 Awr. Mi fydd cenedlaethau o blant Cymru yn ei chofio'n gynnes fel y cymeriad poblogaidd Rala Rwdins. Roedd ei thalent ar sgrin ac ar lwyfan yn amhrisiadwy ac mi fydd colled fawr ar ei hôl. Mae ein meddyliau gyda theulu a ffrindiau Christine, gan ddiolch iddi am ei chyfraniad rhagorol ar amryw o gynyrchiadau S4C dros nifer fawr o flynyddoedd."

• 

  4 Mawrth 2022

  Teyrnged S4C i Dai Jones, Llanilar

  Mae S4C wedi talu teyrnged i'r darlledwr Dai Jones

  Yn rhestr detholion darlledwyr Cymru, mae Dai Jones, Llanilar, ar y brig.

  Roedd ganddo'r ddawn naturiol honno o gael y gorau mas o bobl, gan ddefnyddio ei ffraethineb, doniolwch a chynhesrwydd naturiol i gyflwyno myrdd o gymeriadau bythgofiadwy cefn gwlad i gynulleidfa deledu chwilfrydig yn y gyfres fytholwyrdd Cefn Gwlad.

  Drwy'r gyfres hon, creodd genre unigryw, gan greu portreadau sensitif o'r bobl yr oedd yn eu cyfarfod heb ddefnyddio'r dulliau confensiynol o gyfweld.

  Yn gyflwynydd naturiol ac yn ganwr tenor blaenllaw, gwnaeth ei farc ar gyfresi adloniant teledu fel Noson Lawen ac yn ei flynyddoedd cynnar, y cwis cyplau Sion a Sian, lle daeth ei ddoniau fel cyflwynydd naturiol gynnes i'r amlwg yn gyntaf.

  Meddai Geraint Evans, Cyfarwyddwr Cynnwys S4C:

  "Wrth i ni gydymdeimlo â'i deulu a'i ffrindiau, rydyn ni'n talu teyrnged i un o ddarlledwyr mwyaf talentog teledu Cymru.

  "Wedi ei eni yn Llundain ond gyda'i galon yn nwfn yng nghefn gwlad Cymru erioed, roedd Dai yn apelio at bawb o gefndiroedd dinesig a gwledig.

  "O'r clos ffarm i lwyfan 'steddfod, ac o'r stiwdio deledu i'r mart, roedd Dai mor gartrefol, a chanddo'r ddawn o wneud pawb arall yn gartrefol yn ei gwmni.

  "Bydd y byd darlledu a chefn gwlad yn sicr yn dlotach o lawer hebddo."