24 Gorffennaf 2026

Mae S4C yn rhoi cyfle o’r newydd i gwmnïau gynhyrchu rhai o’i chyfresi a digwyddiadau mwyaf poblogaidd, wrth iddi weithredu ei strategaeth Mwy na Sianel Deledu.

O fis Hydref 2026, bydd S4C yn cyhoeddi tendrau agored am y canlynol.

• Pawb a’i Farn – cyfres drafod materion cyfoes.
• Cân i Gymru – cystadleuaeth cyfansoddi caneuon gyda’r goreuon yn mynd ben ben â’i gilydd i ennill coron cân orau Cymru.
• Eisteddfod yr Urdd – wythnos o ddarlledu byw o faes prifwyl yr Urdd – yr holl gystadlu a sgyrsiau o’r maes.
• Y Sioe / Y Ffair Aeaf – darlledu byw o gystadlaethau amaethyddol amrywiol o’r Sioe a’r Ffair Aeaf yn Llanelwedd.
• Dechrau Canu Dechrau Canmol – cyfres o ganu mawl ac addoli.

Bydd y tendrau am y cyfnod darlledu 2028 ymlaen, a phob un yn galw am weledigaeth ddigidol-yn-gyntaf. Gall gwmnïau cynhyrchu wneud cais ar gyfer un neu fwy o’r cytundebau.

Meddai Llion Iwan, Prif Swyddog Cynnwys S4C:

"Mae’r penderfyniad i agor y comisiynau hyn i dendr yn adlewyrchu ein hymrwymiad i gynnal sector gynhyrchu creadigol, cystadleuol a chynaliadwy yng Nghymru. Mae pob un o’r rhaglenni hyn yn meddu ar werth diwylliannol sylweddol ac yn chwarae rhan bwysig wrth ddathlu bywyd, iaith a chymunedau Cymru. Edrychwn ymlaen at dderbyn cynigion sy’n parchu cryfder y brandiau sefydledig hyn, gan gyflwyno syniadau ffres ac uchelgais greadigol ar gyfer y dyfodol."