09 Rhagfyr 2008

Mae tri gwyliwr lwcus ar ben eu digon ar ôl ennill treilars cwmni Ifor Williams mewn cystadleuaeth boblogaidd ar S4C.

Roedd y gyfres ffermio a chefn gwlad Ffermio yn cynnig tri threilar gan y cwmni adnabyddus o Gorwen, Ifor Williams Trailers Ltd. mewn cystadleuaeth arbennig dros yr hydref.

Roedd yn rhaid i'r enillwyr, a gafodd eu dewis ar hap o'r holl atebion cywir, geisio dyfalu'r gair cudd ar ôl ateb cyfres o gwestiynau.

Enillwyr y brif wobr oedd Elaine Edwards a'i merch Charlotte o Fryneglwys, Corwen, sydd bellach yn berchnogion hapus bocs ceffylau HB506.

Meddai Elaine Edwards: "Rydyn ni'n falch iawn ein bod wedi ennill y brif wobr yn y gystadleuaeth eleni. Mae Charlotte yn cymryd rhan mewn cystadlaethau neidio gyda'r ceffylau ac mae gennym ychydig o geffylau hela ac Adran B, felly fe fydd y bocs ceffylau'n ddefnyddiol iawn."

Glyndwr Lewis o Landeilo'r Fan, Pontsenni ger Aberhonddu enillodd yr ail wobr a'r treilar bocs ceffylau TA5. EgluroddGlyndwr Lewis: "Bydd y treilar yn ddefnyddiol iawn o gwmpas y fferm. Fy mab sy'n gwneud y rhan fwyaf o'r gwaith nawr ac rwy'n siŵr y bydd y treilar yn ddefnyddiol iawn iddo."

Bryn Evans o Lanrhystud ger Aberystwyth gafodd y drydedd wobr ac ennill treilar P5 newydd sbon. Dywedodd Bryn Evans: "Mae’n newyddion ardderchog. Mae gen i dyddyn yn ardal Llanrhystud a dwi'n cadw saith o geffylau, felly fe fydd y treilar bach yn ddefnyddiol ar gyfer cario'r offer a'r tac i gyd.

Ychwanegodd Richard Rees o gwmni Telesgop, cynhyrchwyr Ffermio: "Mae'r ymateb eleni wedi bod yn wych, gyda dros 3,000 wedi cystadlu, a 1,600 o'r rheiny'n benodol dros y we. Rydym yn ddiolchgar iawn i gwmni Ifor Williams am eu haelioni unwaith eto eleni ac yn llongyfarch yr enillwyr yn wresog.”