S4C
Dewisiadau

Cynnwys

Le Tour de France ar S4C

Ar drothwy dechrau ras feics enwoca'r byd, mae'r seiclwr proffesiynol Gruff Lewis yn dweud bod Cymru'n haeddu cynnal cymalau o Le Tour de France yn y dyfodol.

Unwaith eto eleni, bydd Gruff yn rhan o dîm Seiclo: Le Tour de France, wrth i S4C ddilyn y ras 3,540 km gyda rhaglenni byw ac uchafbwyntiau o bob cymal.

"Yn sicr, byddai cynnal rhan o'r Tour yng Nghymru'n wych," meddai Gruff, wrth ymateb i'r newyddion diweddar bod Llywodraeth Cymru yn gobeithio denu'r digwyddiad i Gymru.

"Mae tirwedd grêt yma – gyda digon o fynyddoedd - ac mae pawb sy'n gwneud y Tour of Britain yn siarad am Fynydd Caerffili fel cwrs da. Ond yn fwy na hynny, mae Cymru'n haeddu fe. Mae'r Tour de France wedi bod yn Swydd Efrog, mae'r Giro D'Italia wedi bod yn Iwerddon ac mae cymaint o reidwyr o safon wedi dod o Gymru, felly pam lai?"

Yn arwain tîm cyflwyno Seiclo yn y Tour de France mae Rhodri Gomer, tra bod Llinos Lee yn dod â'r newyddion diweddaraf o'r peloton. Bydd y brodyr ap Gwynedd, Rheinallt a Peredur, sy'n gerddorion adnabyddus, yn cyd-sylwebu, yng nghwmni Wyn Gruffydd, John Hardy a Gareth Rhys Owen.

Bydd Gruff Lewis yn ymuno â'r tîm sylwebu ar wahanol gymalau i gynnig ei arbenigedd, ac mae'n credu y bydd hi'n daith gyffrous gydag enillydd y ras y llynedd Chris Froome yn anelu at bedwaredd fuddugoliaeth yn ras eleni.

"Mae'r ffefrynnau i gyd 'na eleni a does neb wedi cael anaf yn arwain at y ras. Bydd pobl fel Alberto Contador a Nairo Quintana yn siŵr o wthio Cris Froome ond fi ddim yn meddwl bod un reidiwr wedi sefyll allan yn ddiweddar," esbonia Gruff sy'n seiclo i dîm Madison Genesis ac yn byw yn Nhalybont ger Aberystwyth.

Ond bydd ymgyrch Chris Froome i gipio'r siwmper felen yn ddibynnol ar ymdrechion ei gyd-feicwyr ar Team Sky, Geraint Thomas a Luke Rowe, o Gaerdydd. Bydd Geraint Thomas yn dychwelyd i rasio yn y Tour wedi i'w ras Giro d'Italia gael ei difetha gan ddamwain 'nôl ym mis Mai.

"Er ei fod e'n siomedig bod Geraint wedi cael damwain yn Giro, roedd e'n eitha' cynnar yn y ras, ac mae e wedi cael amser i orffwys ers hynny, felly bydd e mewn siâp perffaith ar gyfer y Tour de France," meddai Gruff.

Methu dod o hyd i'r hyn oeddech chi'n chwilio amdano?